ಬೆಂಗಳೂರು: ಕರ್ನಾಟಕ ರಾಜ್ಯದ ಸರ್ಕಾರಿ, ಅನುದಾನಿತ ಹಾಗೂ ಅನುದಾನ ರಹಿತ ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳಲ್ಲಿ 2026–27ನೇ ಶೈಕ್ಷಣಿಕ ಸಾಲಿಗೆ 1ರಿಂದ 10ನೇ ತರಗತಿ ವಿದ್ಯಾರ್ಥಿಗಳ ಮೌಲ್ಯಾಂಕನ ಹಾಗೂ ಪರೀಕ್ಷಾ ವಿಧಾನ ಕುರಿತು ಶಾಲಾ ಶಿಕ್ಷಣ ಇಲಾಖೆಯು ಸಮಗ್ರ ಸುತ್ತೋಲೆಯನ್ನು ಪ್ರಕಟಿಸಿದೆ. ವಿದ್ಯಾರ್ಥಿಗಳ ಕಲಿಕಾ ಗುಣಮಟ್ಟವನ್ನು ಹೆಚ್ಚಿಸುವುದು, ನಿರಂತರ ಮೌಲ್ಯಾಂಕನಕ್ಕೆ ಒತ್ತು ನೀಡುವುದು ಹಾಗೂ SATS ತಂತ್ರಾಂಶದ ಮೂಲಕ ಪಾರದರ್ಶಕ ದಾಖಲೆ ನಿರ್ವಹಣೆಗೆ ಆದ್ಯತೆ ನೀಡಲಾಗಿದೆ.

ಪ್ರಮುಖ ಅಂಶಗಳು

ಕಲಿಕಾ ಚೇತರಿಕೆ ಮತ್ತು ಸೇತುಬಂಧ: ವಿದ್ಯಾರ್ಥಿಗಳ ಕಲಿಕಾ ಅಂತರವನ್ನು ನಿವಾರಿಸಲು ಕಲಿಕಾ ಚೇತರಿಕೆ, ಕಲಿಕಾ ಬಲವರ್ಧನೆ ಹಾಗೂ ಸೇತುಬಂಧ ಕಾರ್ಯಕ್ರಮಗಳನ್ನು ಮುಂದುವರಿಸಲಾಗಿದ್ದು, ಅಗತ್ಯ ಕೈಪಿಡಿಗಳು DSERT ವೆಬ್‌ಸೈಟ್‌ನಲ್ಲಿ ಲಭ್ಯವಿವೆ.

ದ್ವಿಭಾಷಾ ತರಗತಿಗಳು: ಆಯ್ದ ಕರ್ನಾಟಕ ಪಬ್ಲಿಕ್ ಶಾಲೆಗಳು (KPS), PM SHRI ಹಾಗೂ ಸರ್ಕಾರಿ ಶಾಲೆಗಳಲ್ಲಿ 1ರಿಂದ 5ನೇ ತರಗತಿವರೆಗೆ ಏಕತರಗತಿ ದ್ವಿಭಾಷಾ ಶಿಕ್ಷಣ ವ್ಯವಸ್ಥೆ ಜಾರಿಯಲ್ಲಿದೆ.

ಸಮಗ್ರ ಪ್ರಗತಿ ಪತ್ರ (Holistic Progress Card): ವಿದ್ಯಾರ್ಥಿಗಳ ಶೈಕ್ಷಣಿಕ ಹಾಗೂ ಸಮಗ್ರ ಬೆಳವಣಿಗೆಯನ್ನು ದಾಖಲಿಸುವ ಹೊಸ ಪ್ರಗತಿ ಪತ್ರವನ್ನು ಈ ಸಾಲಿನಿಂದ ಜಾರಿಗೊಳಿಸಲಾಗಿದೆ.

SATS ಅಂಕಗಳ ದಾಖಲಾತಿ: ಎಲ್ಲಾ ರೂಪಣಾತ್ಮಕ (FA) ಮತ್ತು ಸಂಕಲನಾತ್ಮಕ (SA) ಮೌಲ್ಯಾಂಕನಗಳ ಅಂಕಗಳನ್ನು ಕಡ್ಡಾಯವಾಗಿ SATS ತಂತ್ರಾಂಶದಲ್ಲಿ ದಾಖಲಿಸಬೇಕು.

ತರಗತಿವಾರು ಮೌಲ್ಯಾಂಕನ ವಿಧಾನ

1 ರಿಂದ 5ನೇ ತರಗತಿ

FA-1 ರಿಂದ FA-4: ತಲಾ 15 ಅಂಕಗಳು

ಲಿಖಿತ – 10

ಮೌಖಿಕ – 5

SA-1 ಮತ್ತು SA-2: 50 ಅಂಕಗಳ ಪರೀಕ್ಷೆಯನ್ನು 20 ಅಂಕಗಳಿಗೆ ಪರಿವರ್ತಿಸಲಾಗುತ್ತದೆ.

ಒಟ್ಟು ಅಂಕಗಳು:
FA (15×4 = 60) + SA (20×2 = 40) = 100 ಅಂಕಗಳು

6 ರಿಂದ 8ನೇ ತರಗತಿ

FA-1 ರಿಂದ FA-4: LBA ಆಧಾರಿತ 20 ಅಂಕಗಳ ಲಿಖಿತ ಪರೀಕ್ಷೆ ನಡೆಸಿ 10 ಅಂಕಗಳಿಗೆ ಪರಿವರ್ತಿಸಲಾಗುತ್ತದೆ.

SA-1 ಮತ್ತು SA-2: 50 ಅಂಕಗಳ ಪರೀಕ್ಷೆಯನ್ನು 30 ಅಂಕಗಳಿಗೆ ಪರಿವರ್ತಿಸಲಾಗುತ್ತದೆ.

8ನೇ ತರಗತಿ: ವಾರ್ಷಿಕ ಪರೀಕ್ಷೆ 60 ಅಂಕಗಳಿಗೆ ನಡೆಯುತ್ತಿದ್ದು, ನಂತರ 30 ಅಂಕಗಳಿಗೆ ಪರಿವರ್ತಿಸಲಾಗುತ್ತದೆ.

ಒಟ್ಟು ಅಂಕಗಳು:
FA (10×4 = 40) + SA (30×2 = 60) = 100 ಅಂಕಗಳು

9 ಮತ್ತು 10ನೇ ತರಗತಿ

FA-1 ರಿಂದ FA-4:

2 ಚಟುವಟಿಕೆ/ಯೋಜನೆಗಳು – ತಲಾ 15 ಅಂಕಗಳು

1 ಲಿಖಿತ ಪರೀಕ್ಷೆ – 20 ಅಂಕಗಳು

ಒಟ್ಟು 50 ಅಂಕಗಳನ್ನು ನಿಯಮಾನುಸಾರ ಪರಿವರ್ತಿಸಲಾಗುತ್ತದೆ.

ವಾರ್ಷಿಕ ಪರೀಕ್ಷೆ:

ಪ್ರಥಮ ಭಾಷೆ – 100 ಅಂಕಗಳು

ದ್ವಿತೀಯ/ತೃತೀಯ ಭಾಷೆ ಹಾಗೂ ಕೋರ್ ವಿಷಯಗಳು – 80 ಅಂಕಗಳು

10ನೇ ತರಗತಿ ಪರೀಕ್ಷೆ: ಕರ್ನಾಟಕ ಶಾಲಾ ಪರೀಕ್ಷೆ ಮತ್ತು ಮೌಲ್ಯ ನಿರ್ಣಯ ಮಂಡಳಿ (KSEAB) ನಡೆಸಲಿದೆ.

ಅಂತಿಮ ಫಲಿತಾಂಶ: ಆಂತರಿಕ ಮೌಲ್ಯಾಂಕನ ಮತ್ತು ವಾರ್ಷಿಕ ಪರೀಕ್ಷೆಯ ಅಂಕಗಳನ್ನು ಸೇರಿಸಿ 625 ಅಂಕಗಳಿಗೆ ಪ್ರಕಟಿಸಲಾಗುತ್ತದೆ.

ಇಲಾಖೆಯ ಸೂಚನೆಗಳು

ಪ್ರತಿಯೊಂದು ಮೌಲ್ಯಾಂಕನ ಪೂರ್ಣಗೊಂಡ ತಕ್ಷಣ ನಿಗದಿತ ಅವಧಿಯಲ್ಲಿ SATS ತಂತ್ರಾಂಶದಲ್ಲಿ ಅಂಕಗಳನ್ನು ದಾಖಲಿಸುವುದು ಕಡ್ಡಾಯ.

‘ಸಮುದಾಯದತ್ತ ಶಾಲೆ’ ಕಾರ್ಯಕ್ರಮದಡಿ ವಿದ್ಯಾರ್ಥಿಗಳ ಕಲಿಕಾ ಪ್ರಗತಿಯನ್ನು ಪೋಷಕರು ಹಾಗೂ ಎಸ್‌ಡಿಎಂಸಿ ಸದಸ್ಯರೊಂದಿಗೆ ಹಂಚಿಕೊಳ್ಳಬೇಕು.

ಶಾಲಾ ಮುಖ್ಯಸ್ಥರು ಮತ್ತು ಶಿಕ್ಷಕರು ಮೌಲ್ಯಾಂಕನ ಪ್ರಕ್ರಿಯೆಯನ್ನು ಸುತ್ತೋಲೆಯಂತೆ ಕಟ್ಟುನಿಟ್ಟಾಗಿ ಅನುಷ್ಠಾನಗೊಳಿಸುವಂತೆ ಇಲಾಖೆ ಸೂಚಿಸಿದೆ.