ರಾಜ್ಯದ ಸರ್ಕಾರಿ ಪ್ರಾಥಮಿಕ ಶಾಲೆಗಳಲ್ಲಿನ ಪೂರ್ವ ಪ್ರಾಥಮಿಕ (LKG/UKG) ತರಗತಿಗಳನ್ನು ಮತ್ತಷ್ಟು ಬಲಪಡಿಸಲು ಮತ್ತು ಮಕ್ಕಳನ್ನು ಆಕರ್ಷಿಸಲು ಸರ್ಕಾರ ಮುಂದಾಗಿದೆ. ಸಮಗ್ರ ಶಿಕ್ಷಣ ಕರ್ನಾಟಕ ವತಿಯಿಂದ ರಾಜ್ಯದ ಆಯ್ದ 1,116 ಸರ್ಕಾರಿ ಪ್ರಾಥಮಿಕ ಶಾಲೆಗಳಿಗೆ ಒಟ್ಟು 11.16 ಕೋಟಿ ರೂಪಾಯಿಗಳ ಅನುದಾನವನ್ನು ಬಿಡುಗಡೆ ಮಾಡಿ ಆದೇಶ ಹೊರಡಿಸಲಾಗಿದೆ.
ಯಾವ ಉದ್ದೇಶಕ್ಕೆ ಎಷ್ಟು ಹಣ?
ಪ್ರತಿ ಶಾಲೆಗೆ ಒಟ್ಟು 1 ಲಕ್ಷ ರೂಪಾಯಿ ಅನುದಾನ ನೀಡಲಾಗುತ್ತಿದ್ದು, ಅದನ್ನು ಈ ಕೆಳಗಿನಂತೆ ಬಳಸಲು ಸೂಚಿಸಲಾಗಿದೆ:
ಶಿಶು ಸ್ನೇಹಿ ಪೀಠೋಪಕರಣಗಳು (Child Friendly Furniture): ₹30,000 (4 ರಿಂದ 6 ವರ್ಷದ ಮಕ್ಕಳಿಗೆ ಅನುಕೂಲವಾಗುವ ಆಕರ್ಷಕ ಬೆಂಚ್ ಮತ್ತು ಮೇಜುಗಳು).
ಬಾಲಾ ಫೀಚರ್ಸ್ (BALA Features – Building as Learning Aid): ₹30,000 (ಶಾಲೆಯ ಗೋಡೆ ಮತ್ತು ಕಿಟಕಿಗಳನ್ನು ಕಲಿಕಾ ಸಾಧನಗಳಾಗಿ ಬಳಸಿಕೊಳ್ಳುವ ವಿನ್ಯಾಸ).
ಹೊರಾಂಗಣ ಕ್ರೀಡಾ ಸಾಮಗ್ರಿಗಳು (Out Door Play Materials): ₹40,000 (ಮಕ್ಕಳ ದೈಹಿಕ ಬೆಳವಣಿಗೆಗೆ ಪೂರಕವಾದ ಆಟದ ಸಾಮಗ್ರಿಗಳು).
ಪ್ರಮುಖ ಸೂಚನೆಗಳು:
ಈ ಅನುದಾನವನ್ನು ಬಳಸಿಕೊಂಡು ಒಂದು ತಿಂಗಳ ಒಳಗಾಗಿ ಎಲ್ಲಾ ಸಾಮಗ್ರಿಗಳನ್ನು ಖರೀದಿಸಿ ಪ್ರಕ್ರಿಯೆ ಪೂರ್ಣಗೊಳಿಸಲು ಮುಖ್ಯ ಶಿಕ್ಷಕರಿಗೆ ಮತ್ತು ಎಸ್ಡಿಎಂಸಿ (SDMC) ಗೆ ಸೂಚನೆ ನೀಡಲಾಗಿದೆ.
ಖರೀದಿ ಪ್ರಕ್ರಿಯೆಯು ಪಾರದರ್ಶಕವಾಗಿರಬೇಕು ಮತ್ತು ‘ಕೆಟಿಪಿಪಿ’ (KTPP) ನಿಯಮಗಳನ್ವಯ ನಡೆಯಬೇಕು.
ಇದಕ್ಕೆ ಸಂಬಂಧಿಸಿದ ಬಳಕೆಯ ಪ್ರಮಾಣ ಪತ್ರವನ್ನು ಮಾರ್ಚ್ 31, 2026ರೊಳಗೆ ಸಲ್ಲಿಸಲು ಆದೇಶದಲ್ಲಿ ತಿಳಿಸಲಾಗಿದೆ.
ಈ ಕ್ರಮದಿಂದ ಸರ್ಕಾರಿ ಶಾಲೆಗಳಲ್ಲಿನ ಪೂರ್ವ ಪ್ರಾಥಮಿಕ ಶಿಕ್ಷಣದ ಗುಣಮಟ್ಟ ಸುಧಾರಿಸಲಿದ್ದು, ಮಕ್ಕಳಿಗೆ ಖಾಸಗಿ ಶಾಲೆಗಳ ಮಾದರಿಯಲ್ಲಿಯೇ ಉತ್ತಮ ಪರಿಸರ ಸಿಗಲಿದೆ ಎಂದು ನಿರೀಕ್ಷಿಸಲಾಗಿದೆ.
